martes, 14 de septiembre de 2010

Aberto o prazo nas Escolas Deportivas Municipais




Un ano máis as Escolas Deportivas Municipais póñense en marcha da man de distintos clubs da cidade de Pontevedra en colaboración co Instituto Municipal de Deportes e a Concellaría de Deportes cun investimento de 100.000 euros. O obxectivo destas escolas é promocionar o deporte entre a poboación en idade escolar para crear ou consolidar novos hábitos que contribúan á mellora da calidade de vida dos nenos, e inicialos na práctica polideportiva encamiñada a unha posterior especialización.

Chegadas estas datas e coincidindo co inicio do curso escolar, o Instituto Municipal de Deportes pon a disposición das entidades deportivas do concello recursos económicos e infraestruturas necesarias para iniciar aos nenos entre 4 e 14 anos en distintas modalidades deportivas como parte da súa educación integral.
Dende o luns, 13 de setembro estará aberto o prazo de inscrición nas Escolas Deportivas Municipais. E a súa actividade comezará o luns, 4 de outubro.

Os rapaces interesados poderán escoller entre unha ampla oferta deportiva. Son 16 as disciplinas deportivas: Atletismo, Educación Física de Base, Baloncesto, Balonmán, Fútbol, Fútbol Sala, Judo, Ximnasia Artística e Trampolín, Ximnasia Rítmica e Acrobática, Tenis, Tenis de Mesa, Loita olímpica, Voleibol, Xadrez, Triatlón e Rugby. Este ano ofrécese Tríatlon como novidade.

A organización das Escolas corre a cargo das seguintes asociacións deportivas do noso Concello, especialistas cada unha delas na modalidade deportiva que desenvolven:

Baloncesto: Estudiantes, Baloncesto Base Pontevedra, Arxil
Atletismo e educación física de base: Sociedade Gimnástica Fútbol masculino: A. Juvenil de Lérez, Fundación Pontetec, Portero 2000, Salgueiriños, S.C.D. Salcedo, S.D. Monte Porreiro
Ximnasia artística: Treboada, Ximnasia Pontevedra
Ximnasia rítmica: Treboada, Ximnasia Pontevedra, Rías Baixas
Judo: Judo Club Pontevedra
Tenis: Club de Tenis de Pontevedra
Tenis de Mesa: C. Tenis de Mesa Monte Porreiro
Balonmán: Teucro. Cisne
Fútbol sala mascul./fem.: Leis 26, C.CC. Act. Física e Deporte, CDAR Xeve
Rugbi: C. Mareantes Rugby Club, Pontevedra C. Rugbi.
Loita: Loita Pontevedra
Voleibol: C. Voleibol Pontevedra
Triatlón: Fed. Galega de Triatlón
Xadrez: Escola Xadrez Pontevedra

A información de horarios, idades, etc atópase no seguinte enlace (Información EDM).

As follas de inscripcións recolleránse no Pavillón Municipal.

Ofértanse 2.000 prazas en todas as modalidades e o prezo de inscrición é de 35 euros/anuais por neno en cada unha das escolas que participe. As oficinas do Instituto Municipal de Deportes, situadas no Pavillón Municipal, ofrecen máis información (09.00-13.00 horas ou de 16.30 a 20.00 horas, de luns a venres) ou tamén se pode obter chamando aos teléfonos 986 87 20 12/ 13.